Impulsa Galicia preséntase ante o tecido investidor e empresarial de Madrid

A Xunta de Galicia, Abanca, Reganosa e os directivos dos promotores dos proxectos tractores en curso, dan as claves de por que a sociedade público-privada é unha ferramenta única en España

7 de marzo de 2023

 

A sala principal da Casa de Galicia quedouse pequena para os que desexaron asistir á presentación da sociedade Impulsa Galicia na capital de España. Nela, empresarios e investidores tiveron a oportunidade de coñecer de boca de todas as partes implicadas a valía desta ferramenta de desenvolvemento de proxectos tractores. Interviron o presidente da Xunta de Galicia, Alfonso Rueda; o vicepresidente primeiro da Xunta de Galicia e presidente de Impulsa Galicia, Francisco Conde; o presidente de Abanca, Juan Carlos Escotet; o director xeral de Reganosa e membro do comité técnico de Impulsa Galicia, Emilio Bruquetas; o director xeral de Mercado de Capitais, Xestión e Distribución de Institucional de Abanca e membro do Comité técnico de Impulsa Galicia, Juan Luis Vargas-Zúñiga; o CEO de Altri Group, José Pina; a directora de Novos Negocios de Naturgy, Silvia Sanjoaquín; a directora de Combustibles Renovables de Repsol, Berta Cabello; o CEO de Ingenostrum, Santiago Rodriguez e a directora xeral de Impulsa Galicia, Enyd López.

O presidente de Abanca, Juan Carlos Escotet, destacou na súa intervención que Impulsa Galicia ten unha característica que a fai excepcional: «aspira a proxectarse no tempo. Foi creada para incidir, baixo criterios de sostenibilidade, no desenvolvemento dunha estrutura económica cada vez máis produtiva, máis competitiva e máis inclusiva».

Pola súa banda o vicepresidente da Xunta de Galicia e presidente de Impulsa, Francisco Conde, asegurou ante os presentes que en Galicia «hai un profundo interese para captar investimentos cara ao obxectivo que temos desde o punto de vista da política económica que é apostar por unha axenda industrial no horizonte do 2030 (...) En ese contexto se sitúa Impulsa. Pretende ser a plataforma das iniciativas empresariais tractoras nesa axenda industrial».

Emilio Bruquetas e Juan Luis Vargas-Zúñiga, como membros do comité técnico, explicaron brevemente as orixes de Impulsa e a natureza dos proxectos en marcha. Ambos fixeron fincapé na circularidade destes, non por sostibles, senón porque son proxectos que xerarán outros proxectos, expandíndose noutros sectores e que atraerán investimento e talento de fóra.

Investimento como a que está a facer a compañía portuguesa Altri nesta fase inicial da posta en marcha dun complexo industrial pioneiro na produción de fibras textiles a partir de madeira galega certificada. José Pina, CEO de Altri, afirmou que un dos motivos de tomar a decisión de apostar por este proxecto foi o apoio da Administración a través de Impulsa Galicia.

Na mesma liña incidiron, Berta Cabello de Repsol e Silvia Sanjoaquín de Naturgy, empresas promotoras xunto a Reganosa do proxecto de xeración de biogás e fertilizantes a partir de excedentes de dexeccións gandeiras. Nun proxecto «único por dar unha solución para todo o territorio» e no marco da descarbonización, destacaron a grande importancia da colaboración entre a Administración e as empresas.

Taméno confirmou Santiago Rodríguez, CEO de Ingenostrum, a empresa que liderará a construción dun gran centro de datos que facilitará a dixitalización do tecido empresarial e institucional de Galicia e posibilitará que o almacenamento e o procesamento de datos sexa máis barato.

Por último, e para clausurar a xornada, o presidente da Xunta, Alfonso Rueda, animou aos presentes a investir en Galicia e nos seus proxectos tractores, porque os proxectos en curso «chegaron para ser unha realidade e, a pesar de que estamos no principio do camiño, isto vai abrir as portas a moitos outros proxectos que queremos facer en Galicia (...) Emprender en Galicia merece a pena», afirmou.


Impulsa Galicia selecciona a Ingenostrum como socio industrial para a posta en marcha dun gran centro de datos

A infraestrutura ofrece ata 15 MW IT que dotaría á comunidade de soberanía no control dos seus actos

Suporía unha inversión total de 400 millóns de euros e a xeración duns 100 empregos altamente cualificados, entre directos e indirectos

 

1 de marzo de 2023

 

A sociedade público–privada Impulsa Galicia, que ten como principal obxectivo contribuír á transformación da economía galega, seleccionou a Ingenostrum como socio industrial para comezar a análise da viabilidade dun gran centro de datos. Esta infraestrutura suporía un punto de inflexión na dixitalización do tecido empresarial e institucional da comunidade autónoma.

Así o comunicaron os responsables do proxecto ao presidente da Xunta de Galicia, Alfonso Rueda, nunha reunión mantida esta tarde na sede do Goberno galego á que asistiron Francisco Conde, vicepresidente primeiro da Xunta e presidente de Impulsa Galicia; Miguel Corgos, conselleiro de Facenda da Xunta e membro do comité técnico de Impulsa Galicia; Juan Luis Vargas-Zúñiga, director xeral de Mercado de Capitais, Xestión e Distribución Institucional de ABANCA e membro do comité técnico de Impulsa Galicia; Enyd López, directora xeral de Impulsa Galicia; Santiago Rodríguez, conselleiro delegado de Ingenostrum e David Gómez, director xeral adxunto de Ingenostrum.

O obxectivo do proxecto de construción e posta en marcha dun gran centro de datos, en liña co Plan Nacional de Recuperación, Transformación e Resiliencia, é a modernización e dixitalización do tecido empresarial galego. Este proxecto busca pór ao servizo da PEME galega, de grandes empresas e institucións públicas, a solución tecnolóxica que lles garanta o almacenamento de datos que precisen, a conectividade de alta velocidade, o ancho de banda suficiente e unha baixa latencia (retardos temporais dentro dunha rede) e así facilitar a dixitalización das PEME ofrecendo servizos que non lograrían obter a día de hoxe no mercado, asegurando economías de escala e eficiencias de custos.

Ademais, permitiría o establecemento de sinerxías con proxectos que xa están en marcha en Galicia. Os 15MW IT de capacidade que se proxectan, posibilitarían aloxar os datos da gran maioría das empresas galegas, o que dotaría a Galicia de soberanía sobre o control dos datos da comunidade.

Ao longo deste último ano, Impulsa Galicia levou a cabo a conceptualización, o deseño do proxecto e a busca dun socio investidor e promotor. A empresa española Ingenostrum é a escollida para liderar o proxecto, quen irá da man da enxeñaría Nexitic especializada no deseño deste tipo de infraestruturas.

Estímase un investimento total de 400 millóns de euros, dos que 130 dedicaríanse á construción en si mesma e os 270 restantes, investiríanse nos servidores de tecnoloxía da información (IT).

Xeraríanse cerca de 200 empregos no período de construción, que neste tipo de infraestruturas se acostuma prolongar durante un ano, e posteriormente, crearíanse uns 100 postos de traballo de alta cualificación para o seu mantemento, entre directos e indirectos.

A directora de Impulsa Galicia, Enyd López destacou que "o centro de datos é un dos proxectos incluídos no Polo para a Transformación de Galicia, co que avanzamos na consecución dun modelo económico dixital e sostible. Desenvolvemos unha idea innovadora, a convertemos nun proxecto tractor e atopamos tecnólogo e investidor para que prospere fóra do noso paraugas". "Estamos moi satisfeitos -engadiu- de atopar un socio sólido e tamén de articular todo o que ven por diante como un proxecto de país, froito da colaboración público-privada e que dará servizo a toda a sociedade galega, converténdonos en punteiros en dixitalización".

Segundo declarou Santiago Rodríguez, conselleiro delegado de Ingenostrum: "Este é un proxecto moi ilusionante para Ingenostrum porque nos afianza como compañía líder na conceptualización de data centers. Confiamos en que esta iniciativa sexa un impulso para o sector dos data center no noso país e nos axude a posicionarnos como o novo hub tecnolóxico de Europa".

SOBRE INGENOSTRUM

Ingenostrum é un grupo de enxeñería internacional líder no sector das enerxías renovables que iniciou a súa actividade en 2009 co propósito de contribuír a debuxar un mapa enerxético renovable no noso país e axudar aos seus clientes e colaboradores na súa ruta progresiva cara á descarbonización. A ampla experiencia internacional no sector, con proxectos desenvolvidos en 14 países en máis de 20 anos, do seu fundador, Santiago Rodríguez Andrés Fernández, e a súa firme convicción da necesidade dun modelo enerxético sostible, guiou á compañía desde as súas orixes. Ingenostrum está formado por un equipo multidisciplinar de profesionais altamente capacitados, e as súas áreas de traballo son asesoría e desenvolvemento de enxeñaría técnica, enerxías verdes, novas tecnoloxías, management de obra, desenvolvemento e promoción de data centers sostibles e neutros en carbono.

 


Impulsa Galicia inicia unha serie de encontros sectoriais co tecido empresarial galego para avanzar no desenvolvemento de novos proxectos tractores

Francisco Conde, vicepresidente primeiro da Xunta de Galicia e presidente da sociedade, participou na primeira das xornadas, centrada no ámbito enerxético

 

8 de febreiro de 2023

 

A sociedade público–privada Impulsa Galicia, que ten como principal obxectivo a axilización de proxectos estratéxicos que contribúan á transformación da economía galega mediante un modelo verde e dixital, reuniuse coas principais empresas enerxéticas que operan en Galicia. O motivo do encontro foi dar a coñecer o funcionamento da sociedade, así como poñerse á súa disposición para o desenvolvemento de novos proxectos tractores. Na reunión participaron Francisco Conde, vicepresidente primeiro da Xunta e presidente de Impulsa Galicia, Enyd López, directora xeral da sociedade, e Paula Uría, secretaria xeral de Industria do Goberno galego.

Con esta xornada, Impulsa Galicia arrinca así unha ronda de encontros sectoriais co tecido empresarial galego. Neste primeiro, centrado no ámbito enerxético, Francisco Conde resaltou que Impulsa Galicia é unha ferramenta creada por instancias da Xunta para desenvolver aqueles proxectos enmarcados no Polo para a Transformación de Galicia, pero que ten vocación de futuro e que está ao servizo de todasas empresas galegas:  "Máis alá dos proxectos que estades levando a cabo en Galicia como promotores, contade con Impulsa Galicia para aqueles proxectos que non poderíades abordar en solitario; proxectos transformadores desde o punto de vista enerxético e que xeren grande impacto".

Na súa intervención, a directora da sociedade, Enyd López, explicou como tras encargarse da fase de conceptualización dunha idea e de desenvolver o proxecto de negocio, buscan o socio industrial ou investidor para que estude a súa viabilidade. "Asinamos un memorando de entendemento co socio promotor seleccionado para garantir que o proxecto sexa inclusivo e que o valor se quede en Galicia, ao tempo que xeramos pegada industrial e un efecto tractor sobre toda a cadea de valor, colocando á peme como centro da estratexia. Posteriormente, acompañámolo en todo o proceso de análise de viabilidade económica, técnica e financeira para levar o proxecto ata a decisión final de investimento", detallou López.

A modo ilustrativo, tanto Francisco Conde como Enyd López, aludiron ao proxecto de xeración de fibras téxtiles sustentables cuxo socio industrial é Alcoa e ao proxecto de xeración de biogás e fertilizantes orgánicos a partir de excedentes de dexeccións gandeiras, no que Impulsa Galicia colabora con Repsol, Reganosa e Naturgy.

Pola súa parte, os representantes das empresas e asociacións asistentes do sector enerxético, agradeceron a convocatoria e o diálogo aberto. Ven útil e necesaria unha ferramenta singular como Impulsa Galicia, onde administración e empresa traballan xuntas e agradeceron o esforzo da Xunta por axilizar a tramitación dos proxectos que industrialicen e dixitalicen Galicia.

Asistiron ao encontro representantes de Endesa, Iberdrola, Windar, EDPR, Repsol, ASIME, Asociación Galega de Hidrógeno, CLUERGAL, Clúster de Biomasa, AGAEN, Adianta e Galenergy.


O proxecto de xestión sostible dos bosques galegos, cuxo promotor industrial é Altri, declarado pola Xunta de Galicia coma estratéxico

Rueda sinala que se trata dunha iniciativa “única en toda Europa” que integra as plantas e polpa e lyocell e insta ao Goberno a aclarar se vai acceder a fondos europeos

Resalta que o mercado das fibras celulósicas sustentable ten un alto potencial de crecemento porque “son máis ecolóxicas que as fibras artificiais” e teñen cada vez máis demanda no sector

Cun investimento superior aos 800 millóns de euros, a iniciativa prevé producir ata 200.000 toneladas anuais de lyocell

 

29 de decembro de 2022

 

O presidente da Xunta, Alfonso Rueda, anunciou a declaración do proxecto de xestión sostible dos bosques galegos, que contempla a posta a marcha da fábrica de fibras téxtiles de Altri en Palas de Rei (Lugo), coma proxecto industrial estratéxico para Galicia. A iniciativa, única en Europa e enmarcada dentro do Polo para a transformación de Galicia, alcanza esta consideración orientada a facilitar a súa tramitación administrativa. “Trátase dun proxecto innovador e ambicioso para producir lyocell, un tecido de alta calidade, máis ecolóxico cas fibras artificiais e cada vez máis demandado pola industria téxtil de todo o mundo”, subliñou Rueda, quen resaltou que “non hai ningún proxecto similar previsto en toda Europa”.

 

“Cun investimento superior aos 800 millóns de euros, estímase que o centro xere 2.500 postos de traballo directos e que xere sinerxías con outros sectores clave da economía galega, como o forestal e o téxtil”, resaltou o presidente. Está orientado á produción de fibras téxtiles coa previsión de acadar as 200.000 toneladas anuais de lyocell, un tecido de alta calidade que goza dunha implantación crecente na industria téxtil por representar unha alternativa ecolóxica ás fibras artificiais de orixe fósil.

 

O proxecto da fábrica que se vai instalar en Palas de Rei é o único destas características previsto actualmente en Europa e integra as plantas de polpa e lyocell, ademais de favorecer sinerxías con outras iniciativas en desenvolvemento no ecosistema galego. Agárdase un impacto dinamizador da zona ao priorizar a contratación de traballadores locais, contribuíndo ao obxectivo de fixar poboación no rural.

 

A declaración como proxecto industrial estratéxico enmárcase na filosofía da Lei de simplificación administrativa e de apoio á reactivación económica de Galicia que busca a captación de investimentos. Permitirá a redución á metade dos prazos -agás os relativos á presentación de solicitudes e recursos- mantendo as garantías técnicas, xurídicas e ambientais.

 

A planta conta con todos os requisitos para ser proxecto industrial estratéxico, xa que supera o investimento mínimo de 20M€ e a creación mínima de 100 postos de traballo
-Altri prevé xerar 2500 postos de emprego directo-. Ademais cumpre co requisito de que as iniciativas deben complementar cadeas de valor, pertencer a sectores estratéxicos ou que estean aliñados cos obxectivos da Unión Europea ou integrarse no financiamento dos NextGeneration.


Impulsa Galicia analiza co presidente da Xunta o avance dos principais proxectos transformadores en marcha

Alfonso Rueda destaca a aposta da Comunidade polas enerxías alternativas e por iniciativas para promover a economía circular que situarían a Galicia na vangarda das renovables e da economía sustentable

 

21 de novembro de 2022

 

O comité técnico de Impulsa Galicia reuniuse co presidente da Xunta, Alfonso Rueda, para analizar os principais proxectos estratéxicos postos en marcha para o avance da Comunidade e as oportunidades para o seu desenvolvemento.

En concreto, o comité informou do estado da situación de iniciativas punteiras como os proxectos que xiran en torno á recuperación de fibras téxtiles, os avances tecnolóxicos ao servizo da Comunidade ou a posta en marcha de alternativas que permitan á sociedade galega e ao seu tecido empresarial competir no eido da enerxías.

O comité técnico de Impulsa coincidiu en que os proxectos nos que traballa a sociedade dentro do Polo para a Transformación de Galicia amosan a aposta polas enerxías alternativas e por iniciativas para promover a economía circular que situarían á Comunidade na vangarda das renovables e da economía sustentable.


Impulsa Galicia preséntase ante a sociedade galega como a ferramenta óptima para captar investimentos e desenvolver proxectos estratéxicos

A xornada divulgativa contou coa participación de Alfonso Rueda, Francisco Conde, Juan Carlos Escotet e de representantes do comité executivo da sociedade, así como de representantes de dous dos proxectos máis avanzados: o de xestión sostible dos bosques galegos e o de economía circular

8 de novembro de 2022

Impulsa Galicia, a sociedade público-privada creada para o desenvolvemento de proxectos estratéxicos, presentouse ante unha nutrida representación da sociedade galega como a ferramenta óptima, única en España, para a canalización de investimentos e a articulación de proxectos estratéxicos merecedores de fondos europeos. Nunha xornada divulgativa organizada en Santiago de Compostela, contou coa participación de representantes do seu accionariado, tanto público como privado, e dos promotores dos principais proxectos en marcha: o de xestión sostible dos bosques galegos e o de economía circular.

Creada en abril de 2021 pola Xunta de Galicia (40 %), Abanca (38 %), Reganosa (12 %) e Sogama (10 %), Impulsa Galicia ten encomendado o desenvolvemento de iniciativas empresariais tractoras que incidan na dinamización, progreso e transformación da economía galega a través dun modelo verde e dixital. Naceu co obxectivo de incentivar a actividade produtiva da comunidade autónoma a partir da captación de investimentos, a incorporación de socios e a colaboración entre institucións públicas e privadas para a posterior posta en marcha e consolidación de propostas empresariais.

Así o recolleu Francisco Conde, presidente de Impulsa Galicia, na súa intervención de benvida. Destacou que esta sociedade se creou co fin de contribuir á transformación verde e dixital do tecido empresarial galego. “É unha oportunidade para transformar o tecido industrial desde a innovación e a sostenibilidade creando emprego de calidad”, afirmou o vicepresidente primeiro do Goberno de Galicia.

Pola súa banda, o presidente de Abanca, Juan Carlos Escotet, na súa intervención en representación do accionariado privado de Impulsa Galicia, reafirmou o compromiso da entidade bancaria por facilitar o acceso aos fondos europeos, atraer novos inversores e amosar que Galicia “é unha terra de oportunidades”.

A xornada tamén contou cunha mesa de diálogo entre dous membros do comité executivo da sociedade, Emilio Bruquetas, director xeral de Reganosa, e Juan Luis Vargas-Zúñiga, director xeral de Mercado de Capitais, Xestión e Distribución Institucional de Abanca, moderados pola directora xeral da sociedade, Enyd López. Nela, Emilio Bruquetas destacou que os proxectos en carteira tiveron a súa orixe no Polo para a Transformación de Galicia xurdido para saír antes e mellor da crise motivada pola pandemia. Alí identificáronse unha serie de proxectos tractores estratéxicos para a economía galega e interconectados entre si. “Son proxectos que aproveitan as ventaxas competitivas que ten Galicia, que xeran inputs e outputs entre todos eles, e estamos seguros que hai moitos máis que poden formar parte deste ecosistema”, declarou Bruquetas.

Nesa liña insistiu Vargas-Zúñiga: “Houbo unha primeira fase de ideas e agora debemos impulsar outros proxectos donde participen outros empresarios, onde atraiamos a unha poboación cualificada”. Garantiu que teñen a capacidade de facer chegar a financiación ás empresas dun modo “máis rápido e eficiente”. E reivindicou a Impulsa Galicia como facilitadora de que os recursos económicos flúan para proxectos estratéxicos como pode ser a creación dun gran centro de datos con sede en Galicia, “que pode xerar novos postos de traballo e un tecido productivo diferenciador”. “Impulsa é dos galegos e ten as portas abertas para os empresarios, para que unha idea poida vir e a conceptualicemos”, abundou.

Nunha segunda mesa, tamén moderada por la directora xeral da sociedade, detalláronse polo miúdo dous dos grandes proxectos xa coñecidos. Por unha banda, o vicepresidente do comité executivo de Altri, Carlos Van Zeller, empresa impulsora do proxecto de xestión sostible dos bosques galegos consistente na posta en marcha dunha fábrica de fibras textiles sostibles en Palas de Rei, explicou que actualmente atópanse 100 enxeñeiros traballando no deseño do complexo fabril e se están a tramitar tódolos permisos e licencias. “O punto crítico é, sen dúbida, a financiación”, afirmou, “mantivemos ata cinco reunións co Goberno de España e é urxente saber se se destinarán fondos europeos a este proxecto que debería ter un PERTE particular polo volume de investimento preciso”.

Por outra banda, Silvia Sanjoaquín, directora de Novos Negocios de Naturgy, e Natalia Barreiro, directora do complexo industrial de Repsol de A Coruña, afondaron no proxecto de economía circular polo que se aproveitarán os excedentes dos xurros bovinos, porcinos e avícolas para producir biogás e fertilizante. Destacaron a colaboración público-privada como clave para o desenvolvemento deste proxecto que afirmaron “é único en España e Europa” e “xenerador de emprego de calidade no marco da transición enerxética en zonas pouco poboadas”. O biogás producido permitirá “descarbonizar o transporte, os fogares e a industria galega”.

Finalmente, clasurou a xornada o presidente da Xunta de Galicia, Alfonso Rueda quen afirmou que as iniciativas maduradas ao abeiro de Impulsa Galicia suman xuntas “millóns de euros de investimento e a previsión da xeración de milleiros de postos de traballo”. “Son proxectos viables, realistas, e poden ser feliz realidade e fonte de riqueza para toda Galicia”, declarou. Tamén reclamou a implicación do Goberno central, a través dos fondos europeos, para a consecución de financiación destes proxectos. “Desde aquí fixemos exactamente todo o que se nos demandou desde Bruxelas e Madrid”, garantiu.

 


A Xunta destaca que o centro de economía circular incrementará a autonomía enerxética de Galicia e as oportunidades laborais, especialmente no rural

O vicepresidente primeiro e conselleiro de Economía, Industria e Innovación, Francisco Conde, e o conselleiro do Medio Rural, José González, mantiveron un encontro con representantes de Reganosa, Repsol e Naturgy, acompañados pola directora xeral de Impulsa Galicia, Enyd López

5 de outubro de 2022

O vicepresidente primeiro e conselleiro de Economía, Industria e Innovación, Francisco Conde, e o conselleiro do Medio Rural, José González, mantiveron un encontro con Reganosa, Repsol e Naturgy, que, xunto coa Impulsa Galicia e a Xunta, promoven o futuro centro de economía circular para a produción de biogás e fertilizantes a partir de residuos gandeiros.

Segundo salientou Conde, esta iniciativa incrementará a autonomía enerxética de Galicia e as oportunidades laborais, especialmente nas zonas rurais, e permite demostrar como a colaboración público-privada permite a xeración e o desenvolvemento de propostas que melloran as capacidades industriais de Galicia.

O proxecto, que suporá 146 millóns de euros de investimento na primeira fase, destaca polo seu compoñente innovador, o seu beneficio ambiental, o apoio ao rural, e por estar enmarcado no reto da transición enerxética. A iniciativa cubriría con biometano un 7% da demanda galega de gas natural de importación.

Nese sentido, o vicepresidente económico da Xunta salientou o papel que desempeña a sociedade Impulsa Galicia. Xunto ao de Altri, este é o segundo proxecto madurado e desenvolvido ao amparo desta entidade público-privada creada coa función de identificar propostas e consolidalas como iniciativas viables.

Así, o proxecto de economía circular é froito de moitos meses de traballo previos, e a previsión dos socios promotores é iniciar o vindeiro mes de novembro os labores de enxeñaría básica. Trátase dunha das grandes propostas coas que Galicia opta aos fondos europeos Next Generation, e por iso a Xunta espera que dunha vez por todas o Goberno amose a súa implicación con este proxecto, que é tamén un dos proxectos seleccionados a poder participar nas convocatorias do Fondo de Transición Xusta.

Pola súa parte, o conselleiro do Medio Rural, José González, destacou que este proxecto de economía circular que busca transformar excedentes de xurros e outros residuos en biometano e fertilizantes orgánicos garantirá en todo momento a dispoñibilidade para os gandeiros das dexeccións gandeiras necesarias para fertilizar as súas terras de maneira sustentable, así como a viabilidade económica das súas explotacións.

Na súa intervención, José González concretou que se prevé instalar en Meirama a primeira planta de dixestión anaerobia que produza gas renovable a partir de excedentes de dexeccións bovinas, porcinas e avícolas mesturadas con outros residuos do sector agroalimentario. A maiores, implantaranse cinco centros de pretratamento asociados a esta planta que se repartirán nunha primeira fase polas provincias da Coruña e Lugo tendo en conta a distribución das explotacións galegas, coa idea de ampliar o proxecto de economía circular tamén a Ourense e Pontevedra, establecendo así unha rede integral de tratamento dos excedentes de dexeccións gandeiras, achegando a iniciativa aos lugares nos que existe carga gandeira.

O titular de Medio Rural engadiu que a execución desta iniciativa contribuiría -ademais- ao cumprimento da nova lexislación medioambiental europea sobre protección do solo agrícola e control de efluentes, así como de nutrición sostible de solo agrario, e daría solución a cuestións recorrentes na xestión e almacenamento de dexeccións gandeiras.

Así mesmo, o conselleiro puxo en valor a colaboración do sector para levar a cabo esta iniciativa, sinalando que en vindeiras datas comezará unha rolda de reunións con cooperativas, asociacións de gandeiros e organizacións agrarias para explicarlles o proxecto buscando sempre a viabilidade das explotacións galegas.


Reganosa, Repsol e Naturgy colaboran con Impulsa Galicia na promoción dun proxecto para transformar excedentes de xurro e outros residuos en biometano e fertilizantes orgánicos

Nunha fase inicial, unha vez obtidas as preceptivas autorizacións administrativas, as tres enerxéticas investirán 146 millóns de euros para xerar anualmente 300 GWh de enerxía renovable con 1,2 millóns de toneladas de dexeccións gandeiras

A primeira planta de produción deste programa prevese en Meirama, con cinco centros de pretratamento asociados

A iniciativa permitiría reducir a dependencia enerxética do exterior e desenvolver a economía circular na comunidade autónoma. Na súa completa despregadura, evitaría a emisión de 500.000 toneladas anuais de CO2 equivalentes e crearíanse ata 600 postos de traballo directos e 1.900 indirectos

As compañías contribúen así a descarbonizar o transporte, a industria e a actividade agroalimentaria galega

O proxecto foi presentado a catro ministerios do Goberno central co obxectivo de encaixalo nos fondos Next Generation

 

28 de setembro de 2022

 

Reganosa, Repsol e Naturgy colaboran con Impulsa Galicia para desenvolver a economía circular cun proxecto que transformaría a grande escala excedentes de dexeccións gandeiras e outros residuos en biometano, fertilizantes orgánicos e CO2 neutro de orixe biolóxica. Esta iniciativa foi concibida para optimizar a xestión de xurros na comunidade autónoma, reducir a dependencia enerxética do exterior, facilitar o cumprimento das novas normas europeas e axudar a descarbonizar a industria, os fogares e a mobilidade. Os promotores están levando a cabo actualmente labores de campo e ensaios que dan continuidade a meses de estudos e investigacións previas.

O proxecto consiste en despregar progresivamente polo territorio unha rede de plantas que valoricen os excedentes de xurros bovinos, porcinos e avícolas mesturados cunha cantidade menor de FORS (fracción orgánica de recollida separada) e RIO (residuos industriais orgánicos) do sector agroalimentario para a produción de enerxía renovable. Así queda recollido no memorando de entendemento que recentemente subscribiron Reganosa, Repsol e Naturgy con Impulsa, a sociedade mixta promovida pola Xunta de Galicia co obxectivo de acompañar iniciativas empresariais que incidan na dinamización, o progreso e a transformación da economía galega a través dun modelo verde e dixital.

Nunha fase inicial, as tres enerxéticas planean construír unha primeira planta de dixestión anaerobia que produza gas renovable e cinco plantas de pretratamento asociadas a esta para deshidratar o excedente de xurro bovino. A planta de xeración de gas renovable emprazaríase en Meirama (Cerceda), zona de transición xusta, mentres que as cinco plantas de pretratamento se repartirían, nunha primeira fase, por concellos da mesma provincia coruñesa e de Lugo, de acordo coa distribución fundamentada no mapa galego de explotacións gandeiras, optimizando así a loxística entre ambos tipos de instalacións.

Cun investimento aproximado de 146 millóns de euros, nesta primeira fase trataríanse anualmente 1.240.000 toneladas de xurros excedentes e produciríanse, amais de fertilizantes orgánicos e CO2 neutro, uns 300 xigawatts hora (GWh) de biometano que se inxectarían á rede de gas natural. Este gas renovable utilizaríase para descarbonizar distintos sectores, como o do transporte, o residencial e o industrial, podéndose empregar nos procesos da refinería de Repsol na Coruña.

 

Ampliación a toda Galicia

Completada esta fase inicial, a intención dos promotores é ampliar o proxecto de economía circular no futuro a toda Galicia, implantando unha rede centralizada de tratamento dos excedentes de dexeccións gandeiras. Neste sistema garantirase a dispoñibilidade para os gandeiros do xurro necesario para abonar as súas terras de xeito sostible, así como a viabilidade económica das súas explotacións. Os cálculos dos promotores determinan que se poderían valorizar arredor de 6 millóns de toneladas de residuos cada ano. Redondeando, o biometano producido (1 TWh anual) equivalería a un 7 % do gas natural de importación que agora se demanda en Galicia, co que a comunidade avanzaría substancialmente na súa autonomía enerxética e no consumo de renovables. O proxecto foi presentado a catro ministerios do Goberno central (Economía, Transición Ecolóxica, Agricultura e Industria) co obxectivo de encaixalo nos fondos Next Generation, tanto pola súa compoñente de circularidade como polo feito de que proporciona unha fonte de enerxía verde e autóctona a partir dos excedentes das dexeccións gandeiras.

Deste xeito, no proxecto global evitaríase tamén a emisión á atmosfera dunhas 500.000 toneladas anuais de CO2  e crearíase emprego de calidade no marco da transición ecolóxica e nos lugares pouco poboados. En suma, algo máis de 600 postos de traballo directos e 1.900 indirectos, considerando tanto a explotación das plantas como a loxística de transporte.

A execución desta iniciativa contribuiría ao cumprimento da nova lexislación medioambiental europea sobre protección do solo agrícola e control de efluentes, así como de nutrición sostible de solo agrario, e daría solución a cuestións recorrentes na xestión e almacenamento de xurros.

Innovador polo seu concepto de integración global fronte á dispersión, este proxecto exemplifica ao mesmo tempo o novo modelo de cooperación público-privada e entre compañías do mesmo sector, estando aberto á participación doutras empresas.

“As partes implicadas neste proxecto traballamos dunha maneira moi intensa para achegar unha solución técnica solvente; agora precisamos que se cree o marco regulamentario que permita desenvolver e implementar os avances”, valorou o director xeral de Reganosa, Emilio Bruquetas, quen reclama políticas que incentiven “dun xeito claro” a produción de biogás en España.

A directora de Combustibles Renovables de Repsol, Berta Cabello, pola súa banda, indicou que “con este proxecto, estratéxico para Repsol, impulsamos a redución de emisións de efecto invernadoiro do transporte e a industria, incrementamos a autonomía enerxética empregando gases renovables obtidos con recursos locais e fomentamos ao mesmo tempo a economía circular e a sustentabilidade dun sector tan importante no noso país como é o gandeiro”.

O director xeral de Renovables, Novos Negocios e Innovación de Naturgy, Jorge Barredo, destacou que “este proxecto de produción de biometano permitirá impulsar a transición enerxética en Galicia e potenciar unha xestión sostible dos residuos, dando un paso adiante cara a economía circular e o desenvolvemento socioeconómico local, ademais de contribuír a reducir a dependencia enerxética do exterior”.

“Este – afirmou a directora xeral de Impulsa, Enyd López- é un proxecto moi relevante para Galicia. Na súa ideación e apoio, a Xunta adiantouse por partida dobre: por unha banda, favorecendo unha áxil descarbonizacion da economía e, pola outra, facilitando aos gandeiros o cumprimento da normativa que vai vir marcada por Europa”. E engadiu: “Ademais de fomentar a economía circular illadamente, esta iniciativa contribuirá a xerar un ecosistema de proxectos sólidos dentro do Polo para a Transformación de Galicia”.


Enyd López Fernández

Unha experta en economía circular dirixirá a sociedade público-privada creada para o desenvolvemento de proxectos estratéxicos de Galicia

Ademais de Enyd López, entran outras dúas persoas no consello de administración: Amparo Alonso, unha especialista en intelixencia artificial, e Rosa María Sánchez-Yebra, vicegobernadora do Banco de Desenvolvemento do Consello de Europa

Santiago de Compostela, 12 de xullo de 2021

Enyd López Fernández, enxeñeira química e licenciada en Químicas pola Universidade de Santiago, e experta en economía circular, dirixirá a Sociedade para o Desenvolvemento de Proxectos Estratéxicos de Galicia, creada en abril pola Xunta, Abanca, Reganosa e Sogama para modernizar a economía da Comunidade autónoma estendendo o modelo de transición verde, xusta e dixital. De feito, o seu principal obxectivo é contribuír á maduración das iniciativas estratéxicas para Galicia. Ao consello de administración, ademais, incorpóranse dous perfís que atesouran recoñecidos coñecementos en materia de intelixencia artificial e economía e política financeira: Amparo Alonso Betanzos e Rosa María Sánchez-Yebra, respectivamente.

O consello de administración designou directora xeral da sociedade a Enyd López (Santiago, 1980), quen ata o de agora comandaba en Galicia Saica Natur, unha área de negocio pertencente ao Grupo Saica que opera no ámbito da economía circular e a xestión de residuos. Anteriormente, dentro do mesmo grupo, dirixira en varios puntos de España outros equipos, divisións e delegacións.

Tamén se formalizaron a entrada no consello de administración de dúas mulleres. Amparo Alonso (Vigo, 1961) é catedrática da Universidade da Coruña no departamento de Ciencias da Computación, presidenta da Asociación Española de Intelixencia artificial e membro do Consello Asesor de Intelixencia artificial.

Por outra banda, Rosa María Sánchez-Yebra (Ourense, 1962), vicegobernadora do Banco de Desenvolvemento do Consello de Europa, tamén entra no consello desta sociedade público-privada. Ao longo da súa traxectoria foi conselleira do Banco de España, da Comisión Nacional do Mercado de Valores (CNMV), así como secretaria xeral do Tesouro e Política Financeira do Goberno central.


Impulsa Galicia nace co obxectivo de contribuír á maduración dos proxectos estratéxicos para Galicia

O vicepresidente segundo e conselleiro de Economía, Empresa e Innovación, Francisco Conde, e os conselleiros de Facenda e Administración Pública, Valeriano Martínez, e do Medio Rural, José González, participaron esta mañá na reunión constitutiva

O Consello de Administración -presidido por Francisco Conde e cuxo vicepresidente é o conselleiro delegado de Abanca, Francisco Botas- está formado por nove membros

Cun capital social de 5 M€ que achegan a Xunta, Abanca, Reganosa e Sogama, a Sociedade está aberta á entrada de novos socios

Santiago de Compostela, 3 de maio de 2021

O vicepresidente económico e conselleiro de Economía, Empresa e Innovación, Francisco Conde, e os conselleiros de Facenda e Administración Pública, Valeriano Martínez, e do Medio Rural, José González, participaron esta mañá na reunión constitutiva da Sociedade para o desenvolvemento de proxectos estratéxicos de Galicia. Así, este instrumento contribuirá, por exemplo, á maduración das iniciativas da candidatura galega agrupadas arredor do Polo para a Transformación de Galicia.

Este Polo, co que se prevé mobilizar máis de 3.000 M€ nos tres primeiros anos, conta con oito iniciativas que nos poden permitir empezar a producir hidróxeno verde, dispoñer dunha planta para converter a celulosa en fibras téxtiles, poñer en funcionamento un centro de xeración de biogás a partir do tratamento de residuos, expandir as enerxías renovables e impulsar a dixitalización industrial.

Impulsa Galicia centrarase, polo tanto, naquelas iniciativas con capacidade de transformación sectorial e cun alto impacto sobre a produtividade, o emprego e o territorio e que xerarán un efecto arrastre sobre todo o tecido produtivo co obxectivo de impulsar a transformación dixital e ecolóxica na Comunidade.

Entre as súas prioridades estará incidir na capilaridade e no efecto multiplicador destes fondos promovendo que as pemes estean no centro da estratexia. Axudará na busca de futuros investidores que contribúan ao desenvolvemento de proxectos e prestará servizos de asesoramento para garantir a presentación e consolidación de novas iniciativas empresariais, como apoio xurídico, económico, administrativo, comercial, industrial e de xestión e dirección. A sociedade, de carácter impulsor, avaliará os proxectos de acordo co seu impacto nas cadeas de valor dos sectores produtivos.

Trátase, pois, dun novo actor que contribuirá a dar impulso á candidatura galega aos fondos Next Generation que, neste momento, abrangue un total de 354 iniciativas que poderían chegar a mobilizar un investimento de 20.000 M€ e que se apoia en tres principios rectores; involucrar as pemes, facer da I+D+i un elemento transversal e fomentar a colaboración público-privada.

Cun capital inicial de 5 M€, dos que a Xunta achega un 40 %, Abanca un 38 %, Reganosa un 12 % e Sogama un 10 %, está aberta á entrada de novos socios. O Consello de Administración está formado por nove membros. A presidencia corre a cargo de Francisco Conde; o conselleiro delegado de Abanca, Francisco Botas, será o vicepresidente; como conselleiros da sociedade figuran os conselleiros do Goberno galego Valeriano Martínez e José González; o director xeral de Reganosa, Emilio Bruquetas; o secretario do Consello de Administración e director xeral de Goberno Corporativo e Asuntos Legais de Abanca, José Eduardo Álvarez-Naveiro; o ex-presidente da Xunta e catedrático de Economía Aplicada da Universidade da Coruña, Fernando González-Laxe; e o tamén catedrático de Economía Aplicada na Universidade de Vigo, Santiago Lago Peñas. O secretario será o responsable de Asesoría Xurídica de Abanca, Eduardo Cortizo.