Rueda pon en valor a colaboración entre a Xunta e a Sociedade Impulsa Galicia para encarar os retos das vindeiras xeracións
Destaca a valía das propostas dos expertos galegos para avanzar en proxectos de importancia para o país como o Polo para a Transformación de Galicia
30 de xuño de 2022
O titular do Goberno galego, Alfonso Rueda, puxo en valor hoxe a colaboración entre a Xunta e a Sociedade Impulsa Galicia para encarar os retos das vindeiras xeracións.
Nun encontro co Consello de Administración da entidade, o presidente da Xunta destacou a valía das propostas dos expertos para avanzar en proxectos de importancia para o país como o Polo para a Transformación de Galicia.
Alfonso Rueda destacou que a Sociedade Impulsa Galicia se puxo en marcha en plena pandemia como un foro de colaboración público-privada. Unha sociedade que naceu da proposta realizada polo Comité de Expertos promovido pola Xunta "para debuxar o camiño a seguir” e á que o presidente galego lle agradeceu “a súa excelente visión” para encarar os retos da Galicia do 2030, “a que queremos deixar ás vindeiras xeracións".
Rueda subliñou tamén a importancia da colaboración público-privada para impulsar o crecemento e consolidación do tecido empresarial galego. “O que necesitamos para Galicia son boas ideas e bos proxectos” e puxo como exemplo as que derivaron na creación do Polo para a Transformación de Galicia, “con empresas nacionais e internacionais de recoñecido prestixio”.
O titular da Xunta de Galicia insistiu na necesidade de que o Goberno central concrete o reparto de axudas para que non queden fóra dos Perte proxectos que son esenciais para o desenvolvemento económico e industrial de Galicia.
Impulsa Galicia presenta ao presidente da Xunta os principais proxectos nos que está traballando
Rueda solicita o compromiso do Goberno central para que estas iniciativas estratéxicas para Galicia poidan materializarse canto antes
7 de xuño de 2022
O presidente da Xunta, Alfonso Rueda, mantivo esta mañá un encontro co comité técnico da Sociedade Impulsa Galicia, no que se avaliaron os principais proxectos nos que Galicia está xa traballando para captar fondos europeos Next Generation.
Así, dentro do Polo para a Transformación de Galicia impulsado pola Xunta coa axuda da Sociedade Impulsa -na que tamén participan Abanca, Sogama e Reganosa-, inclúese o proxecto de fábrica de fibras téxtiles sostibles de Altri, que suporá un importante fito na transformación industrial de Galicia, cun investimento de 800 M€ e 2.500 empregos entre directos e indirectos.
Arredor desta iniciativa, tal e como se subliñou na xuntanza, pivotan outros dous proxectos integrados no Polo, que serven de fonte de enerxía para a fábrica prevista en Palas de Rei (Lugo): o desenvolvemento dunha planta de produción de biometano a partir de xurros e o desenvolvemento dun centro de hidróxeno verde.
Ademais, Rueda puxo de manifesto durante o encontro que os diferentes proxectos incluídos no Polo para a Transformación de Galicia teñen carácter estratéxico e unha gran capacidade de tracción sobre o tecido empresarial galego, o que asegura o crecemento, o emprego e a competitividade, dando resposta aos desafíos que o contexto actual require desde o punto de vista económico, ambiental e social.
Por iso, salientou, espérase que no marco da necesaria colaboración entre administracións, o Goberno central demostre o seu compromiso a través dos Next Generation. Así, a Xunta de Galicia está agardando a que o presidente do Goberno, Pedro Sánchez, atenda a petición de reunión solicitada polo presidente do Executivo galego ante a necesidade de axilizar e descentralizar os fondos europeos, co obxectivo de que estes proxectos estratéxicos se materialicen canto antes, beneficiando sobre todo ás pequenas e medianas empresas.
A Sociedade Impulsa é un mecanismo público-privado participado pola Administración autonómica (40%), Abanca (38%), Reganosa (12%) e Sogama (10%). Esta sociedade encárgase de acelerar a maduración de novos proxectos empresariais tractores, como é o caso desta fábrica de fibras téxtiles, que contribúan a xerar actividade económica e cadeas de valor das que poidan saír beneficiadas especialmente as pequenas e medianas empresas galegas.
O sector forestal coñece o proxecto da fábrica de fibras téxtiles de Altri nunha xornada organizada por Impulsa Galicia
A Xunta asegura que a fábrica de fibras téxtiles será un revulsivo para favorecer a dixitalización da industria forestal e os novos usos da madeira
O Goberno galego garante a máxima axilidade administrativa ao considerar esta iniciativa un proxecto industrial estratéxico
Avanza que a intención da Xunta é celebrar unha nova reunión co Goberno central para identificar os instrumentos, dentro dos fondos europeos, nos que este proxecto pode encaixar
4 de maio de 2022
O vicepresidente económico e conselleiro de Economía, Empresa e Innovación en funcións, Francisco Conde, o conselleiro do Medio Rural en funcións, José González, mantiveron xunto co conselleiro delegado de Altri, Jose Soares, e a directora xeral da Sociedade Impulsa Galicia, Enyd López, esta mañá na Cidade da Cultura, un encontro co sector forestal galego sobre o proxecto da fábrica de fibras téxtiles.
Na súa intervención, Conde asegurou que a fábrica de fibras téxtiles será un revulsivo para a industria forestal, tanto desde o punto de vista dos novos usos da madeira, como da dixitalización do sector e do avance na ecoinnovación e ecodeseño. Destacou, ademais, a capacidade desta iniciativa para xerar emprego de calidade e atraer tanto novas industrias como investimentos nos sectores forestal e téxtil. Neste sentido, Altri prevé a creación de máis de 2500 postos de traballo directos e indirectos e un investimento de 800 millóns de euros.
O vicepresidente económico en funcións sinalou que o importante agora é o desenvolvemento dun traballo conxunto de todas as administracións para que a fábrica xere o impacto desexado. Así, explicou que para a Xunta será un proxecto industrial estratéxico, o que permitirá dotar a súa tramitación dunha maior axilidade, o que contribuirá a poder reducir á metade os prazos de tramitación, mantendo ao mesmo tempo todas as garantías xurídicas, técnicas e medioambientais.
Conde tamén lembrou que o Goberno central coñece este proxecto, xa que é un dos que Galicia seleccionou e presentou como prioritarios, tal e como se lle solicitara desde o Executivo estatal. Avanzou que a intención da Xunta é celebrar un novo encontro co Goberno central para actualizar o estado do proxecto e identificar os instrumentos, dentro dos fondos europeos, que permitirían a súa posta en marcha.
Conde agradeceu a confianza de Altri pola súa aposta de implantarse en Galicia e destacou que se trata dun proxecto que xerará valor en toda a cadea monte-industria. No encontro avaliouse o impacto da fábrica no sector forestal galego, que produce 10 millóns de metros cúbicos de madeira industrial; e explicáronse as ferramentas das que dispón o Goberno galego para garantir a diversidade de recursos forestais como o Plan forestal galego ou a elaboración do inventario forestal permanente.
Este proxecto suporá un importante impulso para o medio rural e para conseguir unha xestión sostible dos bosques e da silvicultura de Galicia.
A Xunta ve na fábrica de fibras téxtiles un proxecto que contribuirá á transformación industrial ao xerar valor en toda a cadea forestal de Lugo e Galicia
O vicepresidente económico e conselleiro de Economía, Empresa e Innovación en funcións, Francisco Conde, o conselleiro do Medio Rural en funcións, José González, e o delegado territorial da Xunta en Lugo, Javier Arias, participaron esta mañá xunto co conselleiro delegado de Altri, Jose Soares, e a directora xeral da Sociedade Impulsa Galicia, Enyd López, nun encontro informativo
O Goberno galego garante a máxima axilidade administrativa ao considerar esta iniciativa un proxecto industrial estratéxico
Conde destaca que esta fábrica encaixa no binomio industria-sustentabilidade e exemplifica a aposta pola colaboración público-privada
3 de maio de 2022
O vicepresidente económico e conselleiro de Economía, Empresa e Innovación en funcións, Francisco Conde, o conselleiro do Medio Rural en funcións, José González, e o delegado territorial da Xunta en Lugo, Javier Arias, participaron xunto co conselleiro delegado de Altri, Jose Soares, e a directora xeral da Sociedade Impulsa Galicia, Enyd López, nun encontro informativo celebrado esta mañá en Lugo sobre o proxecto de fábrica de fibras téxtiles de Palas de Rei.
Desde o Goberno galego, considérase que este proxecto contribuirá á transformación industrial ao xerar valor en toda a cadea forestal galega, a través dun investimento de 800 millóns de euros e a previsión de crear máis de 2500 postos de traballo directos e indirectos.
Conde destacou que esta fábrica encaixa no binomio industria-sustentabilidade porque responde aos criterios que marcou a Comisión Europea para o desenvolvemento dunha economía verde, e exemplifica a aposta pola colaboración público-privada para levar adiante os grandes proxectos cos que Galicia aspira aos fondos europeos. Neste sentido, reiterou a necesidade de que o Goberno central se implique xa que se trata dunha oportunidade na que todas as administracións deben poñer da súa parte.
O vicepresidente económico en funcións explicou que a Xunta trasladou a Altri a máxima confianza para que apostase por implantarse en Galicia, considerando este proxecto industrial estratéxico para garantirlle axilidade administrativa.
Pola súa banda, o conselleiro do Medio Rural en funcións, José González, destacou que esta iniciativa “non ten parangón en ningún outro lugar do mundo” polo feito de pechar o ciclo produtivo e ademais facelo con proximidade ao recurso, é dicir, á madeira.
González definiu o proxecto como un “caso de éxito” da colaboración público-privada e lembrou que se configurou dende o principio como unha iniciativa de xestión forestal sostible, partindo dun recurso propio de Galicia, “moi importante nesta provincia”, como é a madeira. Nesta liña, destacou que a nosa comunidade achega a metade das cortas de madeira de toda España, con 10 millóns de metros cúbicos o ano pasado e que temos “un gran potencial de crecemento”, porque o dato de 2015 era de 7,6 millóns.
Ademais, o titular de Medio Rural cualificou o proxecto como “claramente financiable” no marco dos fondos Next Generation, porque cumpre dous requisitos fundamentais, como son a sustentabilidade e a economía circular. A maiores, o conselleiro vinculou esta iniciativa co desenvolvemento do Plan Forestal de Galicia 2021-2040, no sentido de que supón unha “clara aposta pola certificación dos nosos bosques”. Unha certificación que, engadiu, no caso galego está liderada por organizacións ecoloxistas “que están acreditando que en Galicia hai un monte multifuncional, con biodiversidade e ordenado”.
No encontro explicouse que a localización da fábrica realizouse a partir dun proceso de avaliación de carácter técnico no que se estudaron 46 posibles emprazamentos tendo en conta diversos criterios como a dispoñibilidade dun recurso hídrico suficiente e constante; a dispoñibilidade de 150 hectáreas de terreo; unha orografía plana con posibilidade de ampliación; a compatibilidade coa normativa urbanística, patrimonial e medioambiental; a proximidade á madeira e a infraestruturas enerxéticas e de transporte, así como a distancia a núcleos de poboación cualificados.
Este proxecto suporá un importante impulso para o medio rural e para conseguir unha xestión sostible dos bosques e da silvicultura de Galicia
Altri comunica ó presidente da Xunta que elixe Palas de Rei como a mellor localización posible para o complexo de fibras téxtiles
Feijóo salienta que con esta decisión, froito da análise técnica exhaustiva por parte da empresa, dáse un paso fundamental para avanzar neste proxecto, cumpríndose así coa solicitude feita de xeito unánime polo Parlamento galego para que a fábrica se asentase na provincia de Lugo
O desenvolvemento desta iniciativa implicaría un investimento de 800 millóns e a creación de 2.500 empregos directos e indirectos
O presidente incide na necesidade de “pechar” este proxecto, sendo non só candidato, senón adxudicatario de fondos europeos: “Necesitamos ao Goberno central para pechar este círculo e apostar pola execución material e eficiente dos fondos, de acordo co regulamento dos mesmos”, recalca
26 de abril de 2022
Tras unha reunión co CEO da empresa, José Soares de Pina, o presidente da Xunta, Alberto Nuñéz Feijóo, afirmou que con esta decisión, froito da análise técnica exhaustiva por parte de Altri, dáse un paso fundamental para avanzar neste proxecto, cumpríndose así, ademais, coa solicitude feita de xeito unánime polo Parlamento galego para que a fábrica se asentase na provincia de Lugo.
“Estamos a falar dun investimento de algo máis de 800 millóns de euros e da creación de 2.500 empregos directos e indirectos”, precisou, incidindo na enorme importancia desta planta para a Comunidade, ao converterse na única fábrica de fibras téxtiles de España.
Ao longo da súa intervención, o presidente da Xunta recordou que se trata dunha nova “desexada e traballada” desde hai moito tempo e fixo fincapé na necesidade de “pechar” este proxecto, sendo non só candidato, senón adxudicatario de fondos europeos. “Necesitamos ao Goberno central para pechar este círculo e apostar pola execución material e eficiente dos fondos, de acordo co regulamento dos mesmos”, abundou.
Nesta liña, aseverou que a Administración autonómica, no seu ámbito de competencias, seguirá comprometida e traballando para avanzar en todas as fases do seu desenvolvemento.
O titular do Goberno galego concluíu agradecendo a Altri a decisión de investir en Galicia, cun proxecto co que a Comunidade aspira a sumar o 3 % da produción mundial de fibra sostible.
Miguel Corgos incorpórase ao consello de administración de Impulsa Galicia
O conselleiro de Facenda e Administración Pública da Xunta de Galicia, Miguel Corgos López-Prado, incorporouse hoxe ao consello de administración da Sociedade para o Desenvolvemento de Proxectos Estratéxicos de Galicia (Impulsa Galicia). En representación da Administración autonómica, Corgos (A Coruña, 1971) substitúe no consello ao seu predecesor en Facenda, Valeriano Martínez García.
O consello de administración de Impulsa presídeo Francisco Conde, vicepresidente económico da Xunta. Ten o seu número dous no conselleiro delegado de Abanca, Francisco Botas. Tamén forman parte del, amais de Corgos, o conselleiro do Medio Rural, José González; o director xeral de Reganosa, Emilio Bruquetas; o director xeral de Goberno Corporativo e Asuntos Legais de Abanca, José Eduardo Álvarez-Naveiro, e o responsable de Asesoría Xurídica da mesma entidade financeira, Eduardo Cortizo. Como independentes, fan o propio Fernando González-Laxe, expresidente da Xunta e catedrático de Economía Aplicada da Universidade da Coruña; o tamén catedrático de Economía Aplicada da Universidade de Vigo, Santiago Lago Penas; a presidenta da Asociación Española de Intelixencia Artificial, Amparo Alonso Betanzos, e Rosa María Sánchez-Yebra, vicegobernadora do Banco de Desenvolvemento do Consello de Europa.
Reunido en Santiago, o consello de administración de Impulsa coñeceu este mediodía o grao de desenvolvemento dos proxectos que a sociedade está a madurar e analizou novas liñas de posibles oportunidades.
A sociedade
Cun capital fundacional de cinco millóns de euros, Impulsa foi creada en abril de 2021 pola Xunta de Galicia (40 %), Abanca (38 %), Reganosa (12 %) e Sogama (10 %). A entidade ten encomendado o desenvolvemento de iniciativas empresariais tractoras que incidan na dinamización, progreso e transformación da economía galega a través dun modelo verde e dixital. Naceu co obxectivo de incentivar a actividade produtiva da comunidade a partir da captación de investimentos, a incorporación de socios e a colaboración entre institucións públicas e privadas para a posterior posta en marcha e consolidación de propostas empresariais.
Impulsa pretende dinamizar e ampliar o Polo para a Transformación de Galicia, unha iniciativa que, promovida pola Xunta de Galicia no marco da candidatura aos fondos Next Generation, pretende ser circular, sostible, verde, dixital, viva, inclusiva, xeradora de riqueza na súa contorna e aglutinadora dos intereses de pequenas e medianas empresas, así como de grandes compañías.
A sociedade encargada de viabilizar iniciativas estratéxicas en Galicia selecciona un líder industrial para pilotar as seguintes fases do proxecto para transformar madeira en fibra téxtil sostible
Impulsa asinará con Altri un acordo que persegue a fabricación na comunidade autónoma dunhas 200.000 toneladas anuais de lyocell.
Prevese un desembolso global de 800 millóns no proxecto e a xeración de 1.500 postos de traballo directos e 6.500 indirectos.
Definido baixo os principios de circularidade e sustentabilidade, o plan está aberto á colaboración de todo o sector galego, pon en valor o territorio e pecha o ciclo de produción en Galicia.
Santiago, 1 de outubro de 2021.
A Sociedade para o Desenvolvemento de Proxectos Estratéxicos de Galicia (Impulsa Galicia) conseguiu investidor e tecnólogo para unha das iniciativas tractoras en cuxa maduración viñera traballando ao longo dos últimos meses: o proxecto que transformará madeira en fibra téxtil. Así, subscribirá con Altri un acordo que persegue a fabricación na comunidade autónoma dunhas 200.000 toneladas anuais de fibras téxtiles sostibles, utilizando como materia prima principal madeira procedente dos bosques galegos, así como reciclaxe téxtil.
Baseada en criterios técnicos, operativos e estratéxicos, a elección do tecnólogo veu precedida dun proceso selectivo equitativo, homoxéneo e de ámbito nacional e internacional. O líder industrial escollido, que nas seguintes fases explorará alianzas con toda a cadea de valor do sector forestal galego, comprométese a custear o deseño e desenvolvemento da iniciativa ata levala ao momento do investimento. Ata entón, Impulsa cooperará con Altri na procura de emprazamentos para a actividade e na tramitación administrativa.
Prevese un desembolso global estimado de 800 millóns no proxecto. Entre outras medidas, executaríase unha fábrica de lyocell, un tipo de fibra sostible que se comercializaría para fiado, corte e confección. Ese produto obteríase utilizando como materia prima principal madeira procedente dos bosques galegos, así como reciclaxe téxtil. Esta actividade (operación, mantemento e loxística de todo o proxecto) sostería 1.500 postos de traballo directos e 6.500 indirectos, mentres que a construción da factoría empregaría a outros 1.700 profesionais.
O plan foi definido baixo os principios de sustentabilidade, circularidade e innovación. Sen alterar o mercado, a súa aplicación poñerá en valor o territorio, contribuirá á recuperación do rural, promoverá a xestión de madeira certificada, implantará as tecnoloxías máis esixentes desde o punto de vista medioambiental, colmará a vella aspiración de pechar o ciclo produtivo do forestal en Galicia e dará resposta á crecente demanda de fibras téxtiles sostibles, de calidade e fabricadas en proximidade.
“Desenvolvemos unha idea innovadora, convertémola nun proxecto tractor e atopámoslle tecnólogo e investidor para que prospere fóra do noso paraugas. Todo aquilo para o que foi creada esta sociedade mixta dáse neste plan de xestión sostible dos bosques galegos”, explicou a directora xeral de Impulsa, Enyd López. “Estamos moi satisfeitos -engadiu- de atopar un socio sólido e tamén de articular todo o que vén por diante como un proxecto de país, froito da colaboración público-privada e que promove actividades básicas da economía galega. Estamos nos primeiros chanzos dun proxecto inclusivo, aberto no seu desenvolvemento á colaboración de todo o sector forestal galego, pensando especialmente nas pemes e en toda a cadea de valor, que ademais, como o proceso en si mesmo, estará dixitalizada e aplicará os principios da mobilidade sustentable. Agardamos desta iniciativa un gran efecto multiplicador, que se traducirá en emprego sostible a longo prazo”.
A sociedade
Cun capital fundacional de cinco millóns, Impulsa foi creada en abril de 2021 pola Xunta de Galicia (40 %), Abanca (38 %), Reganosa (12 %) e Sogama (10 %). A entidade ten encomendado o desenvolvemento de iniciativas empresariais tractoras que incidan na dinamización, progreso e transformación da economía galega a través dun modelo verde e dixital. Naceu co obxectivo de incentivar a actividade produtiva da comunidade a partir da captación de investimentos, a incorporación de socios e a colaboración entre institucións públicas e privadas para a posterior posta en marcha e consolidación de propostas empresariais.
Nun primeiro momento, Impulsa pretende dinamizar e ampliar o Polo para a Transformación de Galicia, unha iniciativa que, promovida pola Xunta de Galicia no marco da candidatura aos fondos Next Generation, pretende ser circular, sostible, verde, dixital, viva, inclusiva, xeradora de riqueza na súa contorna e aglutinadora dos intereses dunha trintena de pequenas e medianas empresas, así como de grandes compañías.
Unha experta en economía circular dirixirá a sociedade público-privada creada para o desenvolvemento de proxectos estratéxicos de Galicia
Ademais de Enyd López, entran outras dúas persoas no consello de administración: Amparo Alonso, unha especialista en intelixencia artificial, e Rosa María Sánchez-Yebra, vicegobernadora do Banco de Desenvolvemento do Consello de Europa
Santiago de Compostela, 12 de xullo de 2021
Enyd López Fernández, enxeñeira química e licenciada en Químicas pola Universidade de Santiago, e experta en economía circular, dirixirá a Sociedade para o Desenvolvemento de Proxectos Estratéxicos de Galicia, creada en abril pola Xunta, Abanca, Reganosa e Sogama para modernizar a economía da Comunidade autónoma estendendo o modelo de transición verde, xusta e dixital. De feito, o seu principal obxectivo é contribuír á maduración das iniciativas estratéxicas para Galicia. Ao consello de administración, ademais, incorpóranse dous perfís que atesouran recoñecidos coñecementos en materia de intelixencia artificial e economía e política financeira: Amparo Alonso Betanzos e Rosa María Sánchez-Yebra, respectivamente.
O consello de administración designou directora xeral da sociedade a Enyd López (Santiago, 1980), quen ata o de agora comandaba en Galicia Saica Natur, unha área de negocio pertencente ao Grupo Saica que opera no ámbito da economía circular e a xestión de residuos. Anteriormente, dentro do mesmo grupo, dirixira en varios puntos de España outros equipos, divisións e delegacións.
Tamén se formalizaron a entrada no consello de administración de dúas mulleres. Amparo Alonso (Vigo, 1961) é catedrática da Universidade da Coruña no departamento de Ciencias da Computación, presidenta da Asociación Española de Intelixencia artificial e membro do Consello Asesor de Intelixencia artificial.
Por outra banda, Rosa María Sánchez-Yebra (Ourense, 1962), vicegobernadora do Banco de Desenvolvemento do Consello de Europa, tamén entra no consello desta sociedade público-privada. Ao longo da súa traxectoria foi conselleira do Banco de España, da Comisión Nacional do Mercado de Valores (CNMV), así como secretaria xeral do Tesouro e Política Financeira do Goberno central.
Impulsa Galicia nace co obxectivo de contribuír á maduración dos proxectos estratéxicos para Galicia
O vicepresidente segundo e conselleiro de Economía, Empresa e Innovación, Francisco Conde, e os conselleiros de Facenda e Administración Pública, Valeriano Martínez, e do Medio Rural, José González, participaron esta mañá na reunión constitutiva
O Consello de Administración -presidido por Francisco Conde e cuxo vicepresidente é o conselleiro delegado de Abanca, Francisco Botas- está formado por nove membros
Cun capital social de 5 M€ que achegan a Xunta, Abanca, Reganosa e Sogama, a Sociedade está aberta á entrada de novos socios
Santiago de Compostela, 3 de maio de 2021
O vicepresidente económico e conselleiro de Economía, Empresa e Innovación, Francisco Conde, e os conselleiros de Facenda e Administración Pública, Valeriano Martínez, e do Medio Rural, José González, participaron esta mañá na reunión constitutiva da Sociedade para o desenvolvemento de proxectos estratéxicos de Galicia. Así, este instrumento contribuirá, por exemplo, á maduración das iniciativas da candidatura galega agrupadas arredor do Polo para a Transformación de Galicia.
Este Polo, co que se prevé mobilizar máis de 3.000 M€ nos tres primeiros anos, conta con oito iniciativas que nos poden permitir empezar a producir hidróxeno verde, dispoñer dunha planta para converter a celulosa en fibras téxtiles, poñer en funcionamento un centro de xeración de biogás a partir do tratamento de residuos, expandir as enerxías renovables e impulsar a dixitalización industrial.
Impulsa Galicia centrarase, polo tanto, naquelas iniciativas con capacidade de transformación sectorial e cun alto impacto sobre a produtividade, o emprego e o territorio e que xerarán un efecto arrastre sobre todo o tecido produtivo co obxectivo de impulsar a transformación dixital e ecolóxica na Comunidade.
Entre as súas prioridades estará incidir na capilaridade e no efecto multiplicador destes fondos promovendo que as pemes estean no centro da estratexia. Axudará na busca de futuros investidores que contribúan ao desenvolvemento de proxectos e prestará servizos de asesoramento para garantir a presentación e consolidación de novas iniciativas empresariais, como apoio xurídico, económico, administrativo, comercial, industrial e de xestión e dirección. A sociedade, de carácter impulsor, avaliará os proxectos de acordo co seu impacto nas cadeas de valor dos sectores produtivos.
Trátase, pois, dun novo actor que contribuirá a dar impulso á candidatura galega aos fondos Next Generation que, neste momento, abrangue un total de 354 iniciativas que poderían chegar a mobilizar un investimento de 20.000 M€ e que se apoia en tres principios rectores; involucrar as pemes, facer da I+D+i un elemento transversal e fomentar a colaboración público-privada.
Cun capital inicial de 5 M€, dos que a Xunta achega un 40 %, Abanca un 38 %, Reganosa un 12 % e Sogama un 10 %, está aberta á entrada de novos socios. O Consello de Administración está formado por nove membros. A presidencia corre a cargo de Francisco Conde; o conselleiro delegado de Abanca, Francisco Botas, será o vicepresidente; como conselleiros da sociedade figuran os conselleiros do Goberno galego Valeriano Martínez e José González; o director xeral de Reganosa, Emilio Bruquetas; o secretario do Consello de Administración e director xeral de Goberno Corporativo e Asuntos Legais de Abanca, José Eduardo Álvarez-Naveiro; o ex-presidente da Xunta e catedrático de Economía Aplicada da Universidade da Coruña, Fernando González-Laxe; e o tamén catedrático de Economía Aplicada na Universidade de Vigo, Santiago Lago Peñas. O secretario será o responsable de Asesoría Xurídica de Abanca, Eduardo Cortizo.
A Xunta, Abanca, Reganosa e Sogama constitúen a nova sociedade público-privada que se encargará de impulsar os proxectos tractores en Galicia
A Sociedade para o Desenvolvemento de Proxectos Estratéxicos de Galicia nace para madurar iniciativas empresariais con relevante efecto dinamizador na economía galega
Favorecerá a transformación da economía implantando un modelo verde e dixital
Promoverá a captación de fondos, a incorporación de socios e a colaboración entre institucións, ao tempo que fomentará especialmente a participación das pemes
O seu primeiro obxectivo é apoiar a maduración das propostas incluídas na candidatura galega aos fondos europeos Next Generation e axudar despois na busca de futuros investidores para o seu desenvolvemento
Santiago de Compostela, 28 de abril de 2021
A Xunta de Galicia, Abanca, Reganosa e Sogama veñen de constituír a nova sociedade público-privada que se encargará de impulsar iniciativas empresariais tractoras que incidan na dinamización, progreso e transformación da economía galega a través dun modelo verde e dixital.
A Sociedade para o Desenvolvemento de Proxectos Estratéxicos de Galicia nace co obxectivo de incentivar a actividade produtiva da Comunidade a partir da captación de investimentos, a incorporación de socios e a colaboración entre institucións públicas e privadas para a posterior posta en marcha e consolidación de propostas empresariais.
A nova entidade terá entre as súas prioridades fomentar a participación das pemes para que sexan elas as principais beneficiarias dos novos proxectos tractores que contribúan a xerar actividade económica e cadeas de valor. Ademais, prestará diferentes servizos de asesoramento para garantir a presentación e o desenvolvemento das novas actividades empresariais, como apoio xurídico, económico, administrativo, comercial e industrial e de xestión e dirección das iniciativas.
De carácter impulsor, e non investidor, e aberta á entrada de novos colaboradores, esta nova sociedade limitada será de maioría privada. De feito, dispón dun capital inicial de 5 millóns de euros, dos que as achegas de Abanca (38%), Reganosa (12 %) e Sogama (10 %) supoñen o 60 % do total. Pola súa parte, a Xunta de Galicia participa co 40 % restante.
Nesta fase inicial tras a súa constitución, a Sociedade para o Desenvolvemento de Proxectos Estratéxicos de Galicia terá sobre a mesa un primeiro obxectivo: contribuír á maduración dos proxectos tractores incluídos na candidatura galega que opte aos fondos europeos Next Generation, axudando posteriormente a buscar investidores para que poidan desenvolverse.
A proposta galega aos fondos europeos recolle ata o momento 354 proxectos –dos que 247 son públicos y 107 privados– que poderían mobilizar un investimento de preto de 20.000 millóns de euros.
A candidatura de Galicia parte do consenso e inclúe iniciativas que pretenden involucrar ás pemes e chegar a toda a cadea de valor industrial. Ademais, apoiase nos sectores estratéxicos galegos para convertelos en motores que arrastren ao resto do tecido produtivo da Comunidade, prestando especial atención ás pequenas e medianas empresas e aos autónomos.
